O Le Mavaega A Queen Salamasina Le Ulua’i Tupu Tafa’ifa O Samoa.

1. Usu Sanalala Le Manu’a o Safata ia Gatoaitele ma Gasoloai, fa’aee le gafa: o Vaetamasoali’i, Atogauga-A-Tuitoga, ma Lalovi’imama (tama).
2. Usuia Vaetamasoali’i e Tuia’ana Tagaloa Selaginato le atali’i o Tagaloa Fa’aofonu’u, fa’aee le gafa: o Tuia’ana Tamalelagi (tama: ma lana falesefulu).
3. Usu #10 Tuia’ana Tamalelagi ia Vaetoefaga le alo o Tui-Toga Faisautele, faaee le gafa o Salamasina (teine: Ole ulua’i Tupu Tafa’ifa o Samoa, ma le tama fai a So’oaemalelagi Levalasi le fa’avae ole Aiga Salevalasi, e uso o la tina ma Tuia’ana Tamalelagi).
4. Usuia Atogauga-A-Tuitoga e Tonumaipe’a Sauoaiga o Savai’i, fa’aee le gafa: o Tau’ilili, Tupa’i (Vaililigi), ma So’oaemalelagi Levalasi (teine).
5. Usu Lalovi’imama le atali’i o Sanalala Le Manu’a o Safata ia Sefa’atauemana i Fogaoloula, fa’aee le gafa: o Tuiatua Mata’utia Fa’atulou.
6. Toe usuia e Tuiatua Mata’utia Fa’atulou ia So’oaemalelagi Levalasi, fa’aee le gafa: o Tuimavave (tama: alualu toto), ma Salamasina (teine: tama fai; o le afafine o Tuia’ana Tamalelagi ma Vaetoefaga).

O Tuia’ana Tamalelagi i lana usuga muamua ia Nomoaitele le alo o Folasaitu i Faleata fotuai mai o Tuala le tama ulumatua, ole Alii o Aiga ma le fa’avae ole Aiga Satuala. Usuga lona sefulu ia Vaetoefaga le alo ole Tui-Toga fotuai mai o Salamasina na fai ma tama a So’oaemalelagi Levalasi le fa’avae ole Aiga Salevalasi. O Aiga e lua o Samoa.

OLE MAVAEGA A LE ULUA’I TUPU TAFA’IFA O SALAMASINA

Sa ta’oto gasegase o Salamasina i Lotofaga. Ua vaivai o le tupu, ua potopoto Tumua ma aiga. Ona fai lea o mavaega a Salamasina ia aiga ma Tumua. O Papa tuu atu e tausi aiga e iai ua Paia o le aiga o Sa-Levalasi, ma le aiga Sa-Tuala (Aiga E Lua o Samoa) ma latou toga ua paia i le igoa o le Pulu ma le Leuleu; ma ua sa fai mai le mavaega, a fai e iai se tasi ua manuia i le finagalo a Leulumoega ma Lufilufi ona faao’o ina lea o toga i Mulinuu i le Maota o le Tuiatua i Lufilufi ma Nu’uausala i Leulumoega i le Maota o le Tuia’ana.

Salamasina na fanaua Fofoaivaoese, o lana fanau o Taufau ma Sina. Usuia Sina e Tito’iaivao, fa’aee le gafa o Faumuina. Usu Faumuina ia Talaleomalie, fa’aee le gafa o Fonoti. Ua o’o ia Fonoti, ona faato’a taunu’u o le mavaega a Salamasina, au’a ua tofia Fonoti ia Leulumoega ma Lufilufi ma fa’aee i ai o Papa e fa ia Fonoti; ona fa’aooina lea o le mavaega a Salamasina i Mulinu’u ma Nu’uausala Papa e fa o le Tuia’ana ma le Tuiatua lenei.

O LE GAFA TAU TUPU O SALAMASINA

USU Lufasiaitu ia Lagituaiva le afafine o TAGALOALAGI, faaee le gafa o Manu (teine). Usu le TUI-MANU’A ia Manu faaee le gafa o Paenu’ulasi (teine). Usu TUI-TOGA ia Paenu’ulasi faaee ai le gafa o Ulualofaiga (tama), ma Vaetoefaga (teine). USU TUI-A’ANA TAMAALELAGI IA VAETOEFAGA FAAEE LE GAFA O SALAMASINA. O le mafua’aga fo’i lena na ave ai e So’oa’emalelagi Levalasi PAPA E FA ia Salamasina, ona ua matua o ia, ma ua silafia lelei e So’oaemalelagi le GAFA TAU TUPU o SALAMASINA, o lona gafa e tau i le: Tui-Manu’a, Tui-Atua, Tui-A’ana, Tagaloalagi, Tui-Fiti, Tui-Toga, Tui-Raratoga, Tonumaipe’a, ma Vaetamasoali’i (Malietoa La’auli granddaughter).

Fetalaiga ia Alipia, Tumua o Leulumoega ma Lufilufi lea na maua ai le fa’apu’upu’uga o fa’alupega o Samoa e i ai TUMUA MA PULE i le fa’ae’ega e Tupa’i o Papa ia Salamasina, ae mulimuli ane le fa’aopo’opoga o AIGA I LE TAI ma le VA’A O FONOTI ma ITU’AU MA ALATAUA ina ua fa’alelei le taua a le Tupufia a Tui-A’ana Faumuina, o le Tupu o Fonoti ma uso feagai o Va’afusuaga Tole’afoa ma Samala’ulu.

~ by CHRISTIAN BROWN on October 28, 2008.