Tala Ole Gafa Ole Aiga Sa-Levalasi o Samoa

TALA OLE GAFA OLE AIGA O SA-LEVALASI

14. Usu Tui-Fiti ia Si’uuilasisifo le alo o Tui-Atua Puluitua faae’e le gafa fotuai mai o Fata (tama: Suafa “Fata” o Lotofaga le Aiga Salevalasi).
O Fata lenei na malaga ma ona matua i Fiti a’o ititi lava o ia. A’o faae’e le va’a e malaga ai Fata ma ona matua. Ona si’i atu lea ile va’a o le tama, ua ta’ai ile la fala ole va’a, maua ai le suafa “Ta’ai” e fa’amanatu ai le ta’aiga o Fata ile la fala o lo latou va’a ma ona matua. Ua matua le tama a’o iai i Fiti, ona manatu lea o Fata e fia malaga mai i Samoa, ona malaga mai ai lea. Ua sau le malaga taunu’u i gatai o Mulifanua, ona alu a’e lea ua moe ile fuefue. Ua ala a’e ua maua lona igoa o “Fatamoeilefuefue”. Ona alu ai loa fa’atu ile tuasivi o A’ana, o ala ai le malaga mo Atua. Ua alu le malaga i Atua, ona moe lea i gauta o Tuamasaga, ua moe ile pogati ole la’au, maua ai lona igoa, o “Fatamoepogati”. O alu pea le malaga ua taunu’u i gauta o Saoluafata ona moe ai lea. Ua le moe nei Fata i lalo, a ua moe ile tumutumu o le niu, ua ala mai ua maua lona igoa o “Fa’amoeta’ale”, po’o “Fatamoeuaniu”. Ua alu pea le malaga ona moe lea ile Vaimauga ua ta’ua ole Mafa. Ona usu ai lea ia Maugaoalii, faae’e le gafa o Puatau. Ona alu ifo lea ua nofo ile nu’u o Etemuli ona usu gafa ai lea ia Sinasinavaiao le alo o Tui-Atua Fogalepulu, faae’e le gafa o Fata (ii)
15. Usu Fataigoatele ia Sinasinavaiao le alo o Tuiatua Fogalepulu faae’e le gafa, o Fata (ii) – (tama).
Ona o ifo lea o Fataigoatele ma lona atali’i o Fata (ii), i tai ile ele’ele ua ta’ua o Mulifusi ma Tanumaleu i aso nei. O nonofo ai tagata Fiti. Ole tama’ita’i o Fulu’ula-ale-matoto o le ilamutu o Tui-fiti. Ua taunu’u nei iai Fataigoatele ma lona atali’i o Fata (ii), mulimuli ane Fatalevave. Ona fai atu lea o Fataigoatele ile tama’ita’i o Fulu’ula-ale-matoto , “Oi fea o iai tagata ole nu’u? “ Ae tali mai le tamaita’i, “O la ei uta.” Ona fai atu lea o Fataigoatele i le tamaita’i, “Tu’uatu lo’u atali’i lua te nonofo atu, ae sei o’u alu I uta e su’e mai tagata ole nu’u. Ona alu Ioa le o Fataigoatele, ae tu’u lona atali’i o Fata (ii) e nonofo atu ma Fulu’ula-ale-matoto. Ona ma’itaga ai lea o le tamaita’i o Fulu’ula-ale-matoto ile tama o Fata (ii) le atali’i o Fataigoatele. Ona igoa ai lea ia Fatalevave, ona ole vave ona ma’itaga ai le ilamutu o le Tui-fiti ia Fata (ii).
16. Usu Fatalevave ia Fulu’ula-ale-matoto fotuai mai 1. Mulisepu po’o Leu (Teine)
Ole tamaita’i lenei o Fulu’ula-ale-matoto, o lana masani a pe le tai ona alu lea i lalo ole to-sua ua moe ai. Ona a pe le tai, ona matu lea ole alititai ole to-sua. A sua mai le tai, ona lofia foi lea le alititai ole to-sua. E mafua ai le muagagana e fa’apea, “ua ala mai foi le tamaita’i na moe ile aliti ole tai.”
17. Usuia Mulisepu/ Leu e Matasepu o Lepā fotuai mai o Tauili’ili (tama), ma Talalaufala (Teine).
Ona tofia lea o Tauili’ili e lona tama, e alu i Amaile e tapega le a’ai e taunu’u iai le Alii o Aiga.
18. Usuia Talalaufala e Tui-Atua Fa’asoutele o Ti’avea fotuai mai o Fililesalue (Teine)
19. Usuia Fililesalue e Leali’ifanovalevale o Palauli fotuai mai o Popoai (Teine), ma Taufaito’a (Teine).

O le alii Toga sa tautuaina Leali’ifano. Na avane e Leali’ifano e fa’ataunu’u ai le gafa, ona ua matua le Ali’i (Lealiifanovalevale). Ole aganu’u ma agaifanua a Toga. A soifua mai lau ulumatua o se tama’ita’i (teine) ona momoli lea ile Tui-Toga, o lau taulaga ile galuteine ole Tui-Toga. Ole ala lea na momoli ai i Toga Popoai ma Taufaito’a e lo la tama.
20. Usuia Popoai ma Taufaito’a e Tui-Toga (VIII) fotuai mai o Togialelei, ma Tuiavi’i (ia Popoai) ma Puipuifatu (Taufaito’a) – (Maliu Togialele ile fuatau mai Savai’i, e le’i usu gafa)
Ona te’a lea o Togialelei ma Tuiavi’i i Fiti, ae nofo Puipuifatu ole Tui-Toga. Ua mavae aso e tele ona te’a mai lea o Togialelei mai Fiti, ua faoa le Tui-Toga mai ia Puipuifatu na tofia e lo latou tama. Ona filifili ai lea o Popoai ma Taufaito’a po’o ai so laua e maliu i Toga, ona maliu ai lea o Taufaito’a ma le fuatau i Toga. Ua lalata i fanua o Toga le fuatau, ona fa’asaga lea o le fana a Tofele ile lagi. Ua fana le u ma ua pa’u tonu ifo ile tumua’i o Togialelei ma maliu ai. Ona te’a mai lea o Tuiavi’i mai Fiti ua maliu lona uso o Togialelei ile fuatau mai Samoa. Ua sauna foi Tuiavi’i e malaga mai i Samoa, e sa’ili lona aiga i Atua. Ae fa’apea atu le Pipili aua ete alu. O lou uso lena e tanu ile oneone ole matafaga, ua oti ile fuatau mai Samoa. Ona eli lea i luga e Tuiavi’i lona uso, ua ave i uta ma tanu lelei ai. Ona a’au mai ai lea i Samoa e sa’ili lona aiga i Atua.
E taunu’u mai le ausaga a Tuiavi’i i gatai o Apia, o to’o atu le va’a a alo o Sina. Ona fesili lea iai o Tuiavi’i po’o fea a to’o iai lo la va’a? Ae tali mai Le’uli ma Le’efu o la’ua e o e seu. Ona fai atu lea o Tuiavi’i ea pe’a tu’u o la igoa o Le’uli ma Le’efu, ae suafa le tasi ia To’omalatai, a’o le tasi ia Seumanutafa e manatua ai lenei taeao ua o tatou feiloa’i ai ona ua tauesea mai le ausaga. Ona fa’aigoa ai lea o lea ele’ele oi Apia o “Tauesea”. Tauese le ausaga a Tuiavi’i. O lo’o ta’ua fo’i ole Foifale o Salevalasi. O lo’o ala’ala ai Tamaseu ma Faualo.
21. Usu Tui-Toga Puipuifatu ia Pulu-mata-moana le alo o Hulu-a-talala o Toga fotuai mai o Manaia, ma Faisautele (tama).
O le tasi o taofi ile gafa lea e fa’apea ole usuga lea a le Tui-Toga ia Painu’ulasi le alo ole Tuimanu’a fotuai mai ai le teine o Vaetoefaga ma lona tuagane o Ulualofaiga.
22. Usu Tui-Toga Faisautele ia Si’ueatausilinu’u, po’o Painu’ulasi le alo o Tui-Manu’a fotuai mai o Fa’aulufanua, ma Ulualofaiga ( Talamaivao).
Ole tamaita’i lenei o Si’ueatausilinu’u, po’o Painu’ulasi fo’i, na feavea’i e Aumua ma Olotua o Fagaloa e sa’ili ai so la’ua ali’i. Ua so’o Ali’i o Samoa e le alo le tamaita’i. O lea na malaga ai Aumua ma Olotua ma Si’ueatausilinu’u i Toga, maua ai le tasi igoa o Si’uea o tausilinu’u, po’o Painuulasi fo’i. O le ali’i la lenei a Aumua ma Olotua o Ulualofaiga.
23. Usu Tui-Toga Fa’aulufanua ia Taupoimasina le alo o Lefono o Lealatele Savai’i fotuai mai o Vaetoeifaga (teine).
O Vaitoeifaga ole suli o Tui-Toga Puipuifatu, O Tui-Toga Puipuifatu o lona alo Tui-Toga Faisautele, o Tui-Toga Faisautele o lona alo Tui-Toga Fa’aulufanua le tama o Vaetoeifaga le Tina o Salamasina.
24. Usuia Vaitoeifaga le alo ole Tui-Toga e le Tuia’ana Tamalelagi o Leulumoega fotuai mai o Salamasina (teine: ma le ulua’i Tupu Tafa’ifa o Samoa).
Ole tamaita’i lenei o le uluai Tupu Tafa’ifa o Samoa. Ole Tui-A’ana, Tui-Atua, Vaetamasoali’i, ma le Gatoaitele. Ole tama o Tuia’ana Tamalelagi o Tuia’ana Tagaloa Selaginato ma lona tina o Vaetamasoa le alo o Sanalala Le Manu’a ia Gatoaitele le suli o Malietoa La’auli. Ole alo o Tuia’ana Tamalelagi ia Tuitogama’atoe na toe faa’au’au ai le suafa ole Malietoa ia Taulapapa. Ole Sa’o tama’ita’i fo’i lenei o Aiga Salevalasi o Tuitogama’atoe. Ole alo o Tuia’ana Tamalelagi mai lana usuga lona tolu ia Umalau le afafine o Lilomaiava Seve of Safotu fotuai mai ai le tama o Peseta le fa’avae ole Aiga Sapeseta i Savaii. O lona atali’i ulumatua mai lana usuga muamua ia Namoaitele le alo o Folasaitu i Faleata fotuai mai le tama o Tuala, ole ali’i o aiga ma le fa’avae ole Aiga Satuala. A’o lana usuga mulimuli lona sefulu ia Vaetoefaga le alo ole Tui-Toga fotuai mai ai le teine o Salamasina le ulua’i Tupu Tafa’ifa o Samoa ole Aiga Pa’ia o Salevalasi. o Aiga e lua nei o Samoa, ole Aiga fa’alagilagi le Aiga Satuala ma le Aiga Pa’ia o Salevalasi.
25. Usuia Salamasina le ulua’i Tupu Tafa’ifa e Tapumanaia Tonumaipe’a le atali’i o Tonumaipe’a Saumaipe’a o Satupa’itea fotuai mai o Fofoaivaoese (teine), ma Tapumanaia (ii) po’o Tapusatele (tama).
Sa ta’oto gasegase ole tupu o Salamasina i Lotofaga. Ua vaivai o le tupu, ua potopoto Tumua ma Aiga. Ona fai lea o mavaega a Salamasina ia Aiga ma Tumua. O Papa tu’u atu e tausi aiga e iai ua Pa’ia o le Aiga o Sa-Levalasi ma Le Aiga Sa-Tuala, ma latou toga ua pa’ia i le igoa o le ‘Pulu’ ma le ‘Leuleu’. AIGA E LUA O SAMOA. O Tapumanaia (ii) lea na ave i Falealili e Elipo ma Tauanu’u e fai ma o la ali’i ma faae’e iai o la Ao ole Satele, o Satele Tapumanaia (ii) po’o Tapulesatele. Ae fa’asolo pa’ia ma Papa ole Tupu ile ulumatua le teine o Fofoaivaoese.
26. Usuia Tuia’ana Tuiatua Fofoaivaoese e Tauatamainiula’aita le alo o Valasi-i-Ologa ole Aiga Tonumaipe’a o Satupa’itea fotuai mai o Taufau, Sina, ma lo la tuagane o Asomua-lemalama.
O Tuia’ana Tuiatua Taufau lenei na tafea lana utu, ina ua finagalo iai e soso’o lana nofoaina ile Tuia’ana Tuiatua, i lona uso o Sina ma le tama o Faumuina. E mafua ai le muagagana e fa’apea,”Ua tafea le utu a Taufau”. Na usu Tauili’ili i Papa ia Taufau fa’ae’e le gafa o le ali’i o Tupuivao. O le tala i le ali’i lenei o Tupuivao e fiafia tele i le faiva o le seu lupe. Ua o’o ina vaivai le gasegase o lona tina le Tupu o Taufau, ona alu lea o le savali ia Tupuivao e sau ua vaivai le gasegase o lona tina le Tupu, ae le sau lava, ma lana upu e fa’apea “E le mafia ona ou alu atu se’i o’u talia lupe o maunu”. Ona to’atama’i ai lea o lona tina o Taufau. Ua fai atu ia Tumua ma Aiga, “Ua agaleaga la’u tama ia te a’u, ae ia outou fa’alogo mai i la’u upu. 0 le a tafea la’u utu, ae o le a au le utu a lo’u uso o Sina.”
27. Usuia Tuia’ana Tuiatua Sina e Tito’iaivao o Faleatiu fotuai mai o Tuia’ana Tuiatua Faumuina Le Tupufia (tama)
O Tuia’ana Tuiatua Faumuina lenei na mana’o e malaga i Tutuila e a’ami lona uso taufeagai o Tupuivao o lo’o aunu’ua ai (fa’asala). Ona malaga ai lea o Manalelei mai Leulumoega i lona aiga i Lotofaga e totoma, e mana’o Tuia’ana Faumuina i se I’e (toga) e alu ai lana malaga e a’ami Tupuivao. E malaga Manalelei e totoma o mamafa i lona ma’itaga. Ona to’ai lea o Manalelei ia Tupuola i Tanumaleu. Ua taunu’u Manalelei ona fai ai lea o lo la ava ma Tupuola, o le ava o le feiloaiga. Ua uma lo la ava, ona fono lea ile ti. Ua uma ona fa’amatala lea e le tamaita’i ia Tupuola le auga o lana malaga, ona e fia malaga lona ali’i o Tuia’ana Faumuina e a’ami Tupuivao o fa’asala i Tutuila, ae leai se toga e ave ai le malaga a lona ali’i. Ua toe pau lava ia o mea o lo’o ile Tuia’ana ua sau ma ia, ole mutia ma le ma’a. Ona soisoi loa lea o le ali’i o Tupuola ma fa’apea atu, a! matua leo malie lau tala. O le’a fo’i le malaga a le tamaita’i o Manalelei, ona fai ai lea o a la upu ma Tupuola. Ona fa’apea atu lea o Tupuola ile tamaita’i, sauia o lea tu’u lou igoa o Manalelei, ae o le’a e igoa ia “TALALEOMALIE” ona ole “malie o lau tala” i mea na’e sau ma oe. O I’e ia e lua, ole I’e e ave ai le malaga a lou ali’i i Tutuila. Ole tasi I’e, ole I’e o le nofo a lou alo. A alo oe le tamaita’i ona fa’aigoa lea ia “FONOTI”, e manatua ai lo ta’ua ava na sei “FONO NEI ILE TI”. Ua uma lo la ava taumavae ua fono fo’i ile ti. O le masani a Samoa i’na ona po, e fai umu ti. Ole fa’avevela o lau mai le ti-vao ona lafo lea iai. E pei ole masi ulu, pe ole masi fa’i fo’i. Ae ui lea!. Ona folo loa lea e Tupuola le Papa ole Tuia’ana na avatu e Manalelei, maua ai le igoa o Tupuola “Tupuolafolopapa”.
O le fai’a a Tupuola ma Manalelei, Na usu Tuiavi’i ia Letele-o-Talaia le alo o Mata’afa i Ululoloa Faleata fa’ae’e le gafa o Taua’aletoa, ma le teine o Unusialetoa. Usuia Unusialetoa e Malietoa Sa o Mulifanua fa’ae’e le gafa o Togia, Ifopo, ma le teine o Aloalonei. Usuia Aloalonei e Vaovasa o Gataivai Savai’i fa’ae’e le gafa o Manalelei po’o Talaleomalie. Taua’aletoa na usu ia Falenaoti Lelasiu’uila (Fufeai) le alo o Tauili’ili o Amaile Aleipata fa’ae’e le gafa o Tupuola, Tago, ma Pafuti le teine.
28. Usu #1 Tuia’ana Tuiatua Faumuina Le Tupufia ia Manalelei po’o Talaleomalie le alo o Vaovasa o Gataivai Savai’i fotuai mai o Fonoti (tama ulumatua: Ole Ali’i o Aiga ma le Tupu Tafa’ifa o Samoa).
O Fonoti le Tupu Tafa’ifa o Samoa, ole Tui-A’ana, Tui-Atua, Vaetamasoali’i, ma le Gatoaitele, mai le “taua ole Paegauo” po’o le “taua ole Tupufia” a Fonoti ma ona uso taufeagai o Va’afusuaga Tole’afoa ma le teine o Samala’ulu ona ua fia tupu uma, ma na manu malo ai Fonoti. Ole tofiga ole Malo ole tupu o Fonoti: (1) Fa’alupega Aoao O Samoa: Tumua ma Pule, Itu’au ma Alataua, Aiga ile Tai ma le Va’a o Fonoti. (2) Te’o: O oe o le Anava o Taua, Ma lou Manu Samoa. (3) Fia’aitagata: O au Suafa ia o Fatialofa, ma Auelua. O le a fai i la’ua ma Tulauniu o Atua, Punefu o Atua, To’oto’o o le Tuiatua. (4) Mata’utia: O le Va’a o Fonoti, O le Malu o Ma’auga o Leulumoega, ma Lalogafu’afu’a, Lufilufi. Fea, o le Va’a o Fonoti, O fea fo’i e Fa’aopea ia Atua le Fauono. (5) Molio’o: O oe o le Va’a o Fonoti, O oe o le To’o o le Fua. (6) Leutele; (Falefa), O oe o le A’ai o le Tupu o Fonoti. Falefa (District); Sanone, Gagaemalae, Saleapaga, Sagapolu, Falevao, Sauago, Saletele, Uafato. (7) Tofaeono: E Ono Pou o Lufilufi, Fitu ia te oe. E Iva Pou o Leulumoega, Sefulu ia te oe. E Fitu Pou o le Malietoa, Valu ia te oe. E Tolu Pou o Satunumafono, Fa ia te oe. (8) OLe Va’a o Fonoti: Samamea, Ma’asina, Lona, Taelefaga, Salimu ma Ma’auga, Musumusu, Falefa, Sanone, Gagaemalae, Saleapaga, Sagapolu, Falevao, Sauago, Saletele, Uafato, Lalomauga, Manunu, Faleapuna, Lufilufi, Saluafata, Fusi, Salelesi Safanua, Fagaloa, Solosolo, Luatuanu’u. (9) Tumua o Asiata: Ole a Falefa Tumua ia te oe-Sa’iliga Malo o Asiata ia Fonoti. (10) Ole Mavaega a Fonoti le Tupu Tafa’ifa ma lona uso; “O Papa e Fa, O Le A Ia Te A’u Ma La’u Fanau, A’o Le Ao ole Tonumaipe’a mo oe Tole’afoa Ma Lau Fanau”
29. Usu #1 Fonoti le Tupu Tafa’ifa ia Fuatino le alo o To’alepaiali’i o Satapuala ole Aiga Satuala fotuai mai o Muagututi’a (tama ulumatua: Ole Alii o Aiga).
Ina ua gasegase le Tupu Tafa’ifa o Fonoti i Mulinu’u Lalogafu’afu’a ma Sepolata’emo, sa malaga atu le tama o Aputiputiatoloula ma lona tina o Melegalenu’u e asi le fa’atafa o Fonoti le Tupu, ma sa fa’apea lava fo’i le tele o le atunu’u sa gasolo i ai i le taimi lea. Fai mai sa potopoto ai Tumua e lipoi le gasegase o le Tupu. Na i ai fo’i Fuatino le masiofo a le Tupu fa’atasi ai ma lana tama o Muagututi’a le atali’i o Fonoti.
Ua Sa le Sami, Sa le Vao, Sa le Vanimonimo, Ua Pa’ia le Ele’ele. E Sa se isi ona pisa. O tama la nei o Muagututi’a ma Aputiputiatoloula, ua tusa ua ta’i iva o la tausaga le matutua, Ua o i fafo o le maota ma ta’aalo ai ma pisa e pei ona masani ai tamaiti. Sa le lelei i le fa’alogo a Tumua le pisapisao o tamaiti, ona isa lea e Tumua pe ua taofi fo’i. “Sole, aua le pisa o oulua gutu. E te lua iloa lea e fa’atafa le Tupu. Va’ai e leai se isi e toe pisa o la e tapua’i Tumua”. E maua ifo i le fa’afofoga a le Tupu le sai lea a Tumua, ona ia fesili lea: O ai ea na tamaiti e pisa? Ona tali lea o Tumua: O le ali’i lava lea o Muagututi’a ma Aputiputiatoloula, o fanau a Fuatino ma Melegalenu’u. Ona malele mai lea o le Tupu e fa’apea: Tumua, malie lo outou finagalo, aua le ta’ofia tamaiti ua fa’ato’a feiloa’i le uso. E ta’aalo tama a’o se uso. Na ioe Tumua i le malelega a le Tupu e fa’apea: Muagututi’a, O le a e alu ma lou Muagututi’a, ma lou Fuatino, ma lou Faumuina ma lou Melegalenu’u. E te nofo i Mulifusi. E te tua ia Sa-Tuala, ae tausi oe e Leulumoega. Aputiputiatoloula, O le a e fo’i oe ma lou Muagututi’a ma lou Fuatino, ma lou Melegalenu’u ma lou Faumuina, ma lau igoaipu o le Fetaia’imauso, e fa’amanatu ai le aso lenei fa’ato’a fetaia’i ai oulua le uso. Ae mulimuli ane ua mana’o iai lona tama o Tau’iliili ile igoaipu ma ia fa’apea atu ai i lona atali’i: Aumai lau igoaipu o le Fetaia’imauso ma a’u, ae avatu la’u igoaipu o le Fonofili ma oe. Ole ala lea ole taumafa o Tau’iliili ile igoaipu ole Fetaia’imauso, aua o le igoaipu na aumai i le Tupu.
30. Toe usu #2 Fonoti le Tupu Tafa’ifa ia Taeleasa’asa le alo o Tautaiolefue o Tufulele ole Aiga Satuala fotuai mai 0 Falenaoti (teine).
O Falenaoti lenei o le Sa’o tamaita’i ole Aiga SaTuala i Savai’i. E ta’ua fo’i o le Maopu o Tuala ma Sala.
31. Usu #1 Muagututi’a ia Poto le alo Amituana’i Manaia o Si’ufaitoto’a i Faleata fotuai mai o Seutatia (teine ulumatua: ma le Feagaiga ale Aiga).
Ole Mavaega a Muagututi’a ia ala’ala Seutatia ile Maota ile Mulinu’u, e iai ona ala’ala le suafa Seutatia ile Mulinu’u Lalogafu’afu’a ma Sepolata’emo e o’o mai i aso nei.
32. Usuia Seutatia e Lilomaiava Nailevai’iliili Vae-ole-nofoa-fia o Sagafili (Satuimalufilufi) fotuai mai o Nofoatolu Lilomaiava Vaeolenofoafia (tama: Ulua’i suafa “Nofoatolu” i Luilufi Atua).
Ole Ulua’i suafa “Nofoatolu” lenei na e’e i Mulinu’u Lalogafu’afu’a ma Sepolata’emo i Lufilufi. Ma ole fa’amanatuina ole usuga lenei a Lilomaiava Nailevaiiliili Vaeolenofofia ia Seutatia le Feagaiga ale aiga ma le Sa’otama’ita’i i Mulinu’u Luilufi o Tumua Atua. O le uiga o le Nofoa-tolu po’o le Vae-ole-nofoa-fia e fa’amanatu ai ia suafa o le Lilomaiava i afioaga nei e tolu fa’apea:(1.) Ole suafa Lilomaiava i Palauli i Vai’iliili, (2.) Ole suafa Lilomaiava i Satuimalufilufi, (3.) Ole suafa Lilomaiava i Finao i Safotu i Savaii.
33. Usu Nofoatolu Lilomaiava Vaeolenofoafia ia Sinaivaiana le afafine o Va’afusuaga o Faga i Savai’i, fotuai mai o Fonoti Nofoatolu Laufeti’iti’i (tama).
O Lilomaiava Vae-ole-nofoafia Nailevai’iliili ole suli o Tuiavi’i, na usu #1 Tuiavi’i ia Siaposuisui fotuai mai Tuifa’asisina. Tiumalumatua, Tiumalu-ma-Lilomaiava, Lilomaiava Vae-ole nofoa-fia Nailevai’iliili na usu ia Seuta’atia o Mulinu’u i Lufilufi, fotuai mai o Nofoatolu Lilomaiava Vaeolenofoafia na usu ia Sinaivaiana fotuai mai o Fonoti Nofoatolu Laufeti’iti’i.
34. Usu Fonoti Nofoatolu Laufeti’iti’i ia Va’asa le alo o Fiame Muagututi’a le Sa’ofa’apito ma le Aiga Pa’ia o Salevalasi i Lotofaga Atua fotuai mai o Fonoti Oliovaigafa, Ti’auliva’a, ma Lagouta (teine). [Fonoti o Lotofaga Atua]
O Va’asa o le alo o Fiame Muagututiá, ole tasi ole to’afa o lo’o fa’alupe nei i Lotofaga o “Alo-tau-tino ole Sa’ofa’apito ua Fiame”. Ole to’afa lenei e filifili po’o ai so latou suli e nofoia le suafa Fiame, pe’a avanoa. Na usu Fiame Muagututi’a ia Masu le alo o Sitagata Timalesa o Lotofaga fotuai mai o Leaegalesolo (tama), Fuiava’iliili (tama), VA’ASA (teine), ma Va’aloa (teine). O le Mavaega a Fiame Muagututi’a Le Sa’ofa’apito o le Aiga Pa’ia o Sa-Levalasi i Lotofaga Atua, E na’o i la’ua teine o Va’asa: Fonoti, ma Va’aloa: Fiame na tofia e alaala (Maota) i gatai’ala i Mala’e i Mulifusi ma Tanumaleu, po’o le Malae o Papa o le Aiga Pa’ia o Sa-Levalasi i Lotofaga Atua.
35. Fonoti Oliovaigafa na ai ali’i mai ia Molio’o ma le Ailaoa e fai ma o latou Ali’i e iai le ulua’i Suafa Fonoti sa ala’ala i lona maota o ‘Vainiu’ i Faleapuna. Na maliu ai lava le Ali’i ma sa lagomau ai lava. E pa, e leai sona suli.
36. Usu Nofoatolu Ti’auliva’a (i) ia Tamasailau le afafine o Lualemana o Asu i Tutuila, fa’aee le gafa: o Nofoatolu Ti’auliva’a (ii).
37. Usu #1 Nofoatolu Ti’auliva’a (ii) ia Sologaliua le afafine o Sialega o Nu’uuli i Tutuila, fa’aee le gafa: o Fonoti Nofoatolu Fata (tama: ulumatua ‘O le Alii o aiga’), ma Taelimu (teine).
38. Toe usu #2 Nofoatolu Ti’auliva’a (ii) ia Timaima le afafine o Lolo Salulu o Salani i Falealili, fa’aee le gafa: o Nofoatolu Tamasipani (tama), ma Fualeva (teine).
39. Toe usu #3 Nofoatolu Ti’auliva’a (ii) ia Sina le afafine o Gaugau i Sapapali’i, fa’aee le gafa: o Nofoatolu Salatielu (tama), ma Nofoatolu Fata (tama).
40. Usu Fonoti Nofoatolu Fata ia Teoteo Taufagalupe le afafine o Seinafolava i Lotofaga, fa’aee le gafa: o Fonoti Teoteo Tuipu’avai (tama).
41. Usu Fonoti Teoteo Tuipu’avai ia Saumaloto le afafine o Tuala Tamalelagi o Safa’atoa i Lefaga, fa’aee le gafa: o Muiamana (teine: ulumatua ‘Feagaiga a le aiga’), Fonoti Tuala Sola (tama), Gauifaiva Samuela (tama), Poto (teine), ma Fipe (teine).
42. Usuia Muiamana e Teleso o Si’umu, fa’aee le gafa: o Fonoti Pua’a (tama), Lasela (teine), ma Leota Tafilipepe Ioane (tama).
43. Toe usuia Muiamana e Tafea Elise le alo o Lupe Tafea Tuai’ipuniu ma Fonoti Le Taupe Tuipalepale o Matatufu Lotofaga, fa’aee le gafa: o Tafea Lomano Maioa (tama).
44. Usu Tafea Lomano Maioa ia Anne Vaelua Brown le afafine o Tuimanu’a Alexander Brown o Ti’avea Aleipata, fa’aee le gafa: Ola Mika Brown (tama), Fonoti Mata’utia Ioane Brown (tama), Tasala Brown (tama), Bella Brown (teine), ma Fiava’ai Brown (teine).
45. USU HON FONOTI MATA’UTIA IOANE BROWN ia LUISA le alo o L.M.S. Pastor Rev. Ieremia Manulesa FS Mata’utia Tuala o Sataua, Lealatele, Leauva’a ma Amoa i Savai’i ma Upolu, fa’aee le gafa: o Uatogitau Alosio Fonoti Brown (tama), Fonoti Letaupe Ioane Jr Brown (tama: Fonoti Le Taupe o Matatufu 1953), 46. FONOTI INU SAUFO’I BROWN (tama: Fonoti o Lotofaga Atua 1975), Hon Teoteo Asiasi’au Tiatia Sauso’o Fonoti Brown (tama: Faipule ole Malo 1973/1984), 47. FONOTI TUALA LE SA’OALII KAMILO BROWN (tama: Ole Sa’oalii o Satuala 1963, ma Fonoti o Lotofaga Atua 2003), Falesefulu-o-TualamaSala Judith Fonoti Brown (teine), Lili’i Sae Benedict Fonoti Brown (tama), Lemalu Galusina Lalogafau Lui Paulo Asalemo Fonoti Brown (tama), Sailivao Peter Fonoti Brown (tama), Feiloa’ivao Paulo Fonoti Brown (tama), Tagaloamamana Inu Tulo Fonoti Brown (tama), ma Samala’ulu Otila Fonoti Brown (teine).

O LE FIAME LE SA’OFA’APITO MA LE AIGA PA’IA O SALEVALASI I LE MALAE O LOTOFAGA I ATUA

Na ta’oto le fa’atafa o le Tupu Tafa’ifa o Salamasina ile Malae o Mulifusi i Matafagatele, ua ta’ua nei ole Malae o Lotofaga Atua i aso nei. Na to’ai le toma’aga a Manalelei Talaleomalie ia Tupuola Folopapa i Tanumaleu, ole Malae ua ta’ua o Lotofaga Atua i aso nei. Ona o’o mai lea ile taimi o Fiame Muagututi’a o ia lea na fa’ato’a sa’ofa’apito ole Malae ua ta’ua nei o Lotofaga i Atua, le Maota o Fiame le Sa’ofa’apito Muagututi’a o Lotofaga Atua. Ole Malae ole fa’autugatagi.

O le ulua’i Fiame o Ufui’avaopupu i Tanumaleu po’o le Malae o Lotofaga i Atua lea ua ta’ua ai nei, na usu ia Levalasi le alo o Tapu o Letaupe i Mata’tufu, fotuai mai o alii nei o Tuiatua, ma le alii o Muagututi’a lea na soso’o ma lona tama ile nofoia ole Fiame. O Fiame Muagututi’a na si’í e Mata’tufu i lalo i Matafagatele, o le ala lea ua ali’i ta’i ai ia Fiame ma sa’ofa’apito iai e o’o mai ile taimi nei ile Malae o Lotofaga i Atua. O ulua’i sa’o sa ala’ala i Tanumaleu lea ua ta’ua nei ole Malae o Lotofaga i Atua, o Tupuola ma Seinafolava. O lo la fa’alagina e fa’apea: Afio mai e na ulua’i sa’o Tupuola ma Seinafolava, Afio mai le fale agafulu o Fiame, Afio mai le falevalu o Seinafolava, Afio mai fa’aulu’ulu Teoteo ma Tumanuvao, Afio mai le ali’i ole ao le tupe na tago’esea Amituana’i, Maliu mai ali’imau o faleupolu Fa’atili ma Lemauga, Susu mai Sitagata ma le va’á na taumualasi ma le aiga Sasitagata, mamalu mai le faleatua.

Gafa o Fiame Muagututi’a le Sa’ofa’apito ma le Aiga Pa’ia o Salevalasi i Lotofaga Atua:
Usu #2 Tuiavi’i ia Leteleotalaia le afafine o Mata’afa i Ululoloa faaee le gafa o Taua’aletoa (tama), ma Unusialetoa (teine).
Usu #4 Taua’aletoa ia Falenaoti le afafine o Tauilili i Amaile faaee le gafa o Tago (tama), Tupuola (tama), ma Pafuti (teine).
Usu Tupuola ia Lifuti le afafine o Loai i Lotofaga, faaee le gafa o Seigafolava (tama).
Usu Seigafolava ia Taufagalupe le afafine o Leilua i Sagone, faaee le gafa o Samatau’a Siolosega (tama).
Usu Samatau’a Siolosega ia Sivaenae le alo o Po’elaga i Lepa, fa’aee le gafa: o Fiame Ufi’avaopupu (tama: Ole Ulua’i Fiame o Lotofaga), ma Taufau (teine).
Usu Fiame Ufi’avaopupu ia Levalasi le alo o Tapu o Letaupe i Mata’tufu, fa’aee le gafa: o Tuiatua (tama matua: O le Alii o Aiga), ma Muagututi’a (tama: o Muagututi’a lea na suafa ia Fiame o Lotofaga Atua, na soso’o mai i lona tama o Fiame Ufi’avaopupu. Ole Malae o Lotofaga fa’ato’a maua ia Fiame Muagututi’á na si’í e Matatufu i lalo i Matafagatele, o le ala lea ua ali’i ta’i ai ia Fiame ma sa’ofa’apito iai).
Usu Fiame Muagututi’a le sa’ofaapito ia Masu le alo o Sitagata Timalesa i Lotofaga, fa’aee le gafa: o Leaegalesolo (tama), Fuiava’iliili (tama), Va’asa (teine), ma Va’aloa (teine) – (Ole fanau to’afa lenei o lo’o fa’alupe nei i Lotofaga o “Alo-tau-tino ole Sa’ofa’apito ua Fiame”. Ole to’afa lenei e filifili po’o ai so latou suli e nofoia le suafa Fiame, pe’a avanoa.).
Usuia Va’asa e Fonoti Nofoatolu Laufeti’iti’i o Mulinu’u i Lufilufi, fa’aee le gafa: o Fonoti Oliovaigafa (tama), Nofoatolu Ti’auliva’a (tama), ma Lagouta (teine)
[Fonoti o Lotofaga Atua].

TU’UMALO O TUIATUA MATA’UTIA FA’ATULOU

Na fiafia tele So’oaemalelagi Levalasi i le manaia o Aleipata ma le alofa i lona to’alua fou, ua olioli tele ai ma manuia lona olaga ina pe ana le seinoa le amio faitogafiti a Leifi ma Tauloto. Ua aliali nei le a’ano o mea na tauanau ai Mata’utia e fa’aipoipo mo So’oaemalelagi Levalasi, o le fia aumai lea o Papa e fa! o lo’o ia Nafanua mo Atua. La te le’i o iai i le tama’ita’i ma lo la manatu fa’apito, aua fa’aui ane i lana tane, aua ua la iloa e malosi ai le la pule i mea tau suafa ma mea tau faletua. Ae na te’ena vave e Mata’utia lo la manatu. Ua uma ona iloa e Mata’utia e le mafia e A’ana ona tu’u mai o lena Papa se’iloga ua fao fa’amalosi, ma o le uiga la o se taua fo’i. A’o Mata’utia e mana’o tele i le filemu ma le fealofani. Ua le malilie o Leifi ma Tauloto o le te’ena o lo la taofi e le ali’i, ua o i aiga ma saga mafaufau atili. Ua mavae ni aso, ona toe o ane fo’i lea i le ali’i e tauanau pea. A ua atili ai ona mau o le finagalo o Mata’utia, ma ua totama’i tele ai le ali’i i tulafale, aua ua aliali mai lo la loto fa’amaualuga e fia pule aoao i Upolu ma Savai’i.

Ua o’o i le tasi aso, ua fa’alogoina e tulafale o Papa e fa! Ua folafola ia So’oaemalelagi Levalasi i lana malaga na alu i Falealupo. Na manatu loa e sili ona foa’i tonu i le tama’ita’i. E le taumate o le a avea lona alofa i lana tane ma mea nate talia ai ona fa’ae’e uma Papa e fa ia Mata’utia. E le o fea, na te’ena mamao i la’ua e le faletua. E tasi lava le loto o So’oaemalelagi Levalasi ia toe fo’i atu Papa i le nu’u moni o e latou ia Papa, ae na o le Tuiatua ua tatau lea mo lana tane. Ua atili ai ona le malilie mana’o fa’aalualu o Leifi ma Tauloto.

Ua mavae ni isi masina, ua fa’ateleina pea le fiafia ma le fealofani o le ulugali’i a Mata’utia ma So’oaemalelagi Levalasi. O le tasi aso a’o la tofafa, na fa’alogo a’e ai So’oaemalelagi Levalasi ua savali le tagata i lo la fale. Na ia nofo a’e i luga, ae ua iloa se tasi, a’o lo’o tofa pea Mata’utia i ona tafatafa. Na liliu le ali’i ma fa’afuase’i ona e’e ma le tiga tele. Na tago atu So’oaemalelagi Levalasi po o le a, ae te’i ina ua va’aia le foto na tuia ai lona itu. O le fasioti e le taumate, au’a e le o le foto ea ua masani ona fasiotia ai ali’i? Talofa e, ua oso mai le isi auauna toga a So’oaemalelagi Levalasi ua taumafai ona tipi ese le foto ona o le fia lavea’iina o le soifua o le ali’i. Ae paga, ua ulu le ona o le foto ua tigaina tele le ali’i ma ua vave lava ona maliu ai. O le puapuaga tele le mea ua o’o ia So’oaemalelagi Levalasi. Na ia masalomia tagata na faia le galuega leaga ma ua teu i lona loto nate le’i tautala ai. Ua fa’anoanoa Atua uma i le maliu fa’afuase’i o le latou ali’i pele. Oi talofa i le tagata na ia fasiotia pe ana iloa.

Ua mavae ni nai aso ina ua uma le lagi o Mata’utia, ma le mafatia tele o So’oaemalelagi Levalasi i le maliu o lona to’alua pele, e le taumate o le mea lea na fafano ai le ma’itaga o le tama’ita’i ua fanau mai o le alualu-toto. O le alualu-toto la lea na maua ai le tama o lo’o ta’ua i le gafa o”Tuimavave” lona igoa.

MAVAEGA A SO’OAEMALELAGI LEVALASI MA LE FA’AVAE O LE AIGA SALEVALASI

Na fa’apotopoto e So’oaemalelagi Levalasi ona aiga uma, ma ua fai atu i ai. Ua fa’ato’a maua nei se isi alo o Tamaalelagi, ma ua poloa’i mai oute fo’i i Leulumoega. O le a ou sa’uni malaga iai taeao. A’o outou uma nei, o o’u aiga uma lava outou, au’a o outou o uso ma tuafafine o la’u tane ua fa’amatauaina. O nu’u uma toute i ai, o Fagaloa po’o Amaile, lepa po’o Lotofaga, o o’u aiga lava outou ma o le a ta’ua o Sa-Levalasi.

O Sa-Levalasi o Salevalasi le ulua’i aiga i Atua, o outou lava toute puipui ma fa’amamalu le Tuiatua, ona o togafiti vale a nei mea o Faleupolu. O le toe mana’o lava o Tuiatua Mata’utia ia la soso’o ma le tama lea sa i lo’u manava. A ona ua feagai ma nei aso puapuaga ua tupu ai le fa’alavelave, ua fafano la’u tama. A’o lenei o le a ou alu e vavae le tama a Vaetoifaga ma Tamaalelagi (Salamasina) e fai ma sui o Tuimavave. A ia outou nonofo ma fa’aputu ia tele ni ie-toga, ua tele le mamalu. O la’u auauna fa’amaoni lea o Lesi, o le a fai ma tupu’aga o Salelesi. E nofo ia i Saluafata, o ia ma ni ana fanau ia fai ma ‘Agai’ o le Tuiatua. O la’u mavaega lena ua ou tu’u atu i o outou luma, i le o’u alu ai, Levalasi po’o So’oaemalelagi.

Lesi, o le a lau mea na fai ia Tuimavave? O fea oi i ai? Na tali atu Lesi, Na ou tausia lava fa’alelei. O alualu-toto, o lo’o ta’atia i lalo o le ma’a-tele, va’ava’ai e le ‘Uga’. Ona fai atu lea o So’oaemalelagi Levalasi i lona leo mamalu, ‘ua lelei, ia e tupu ma si a’u tama, ia e malosi, ‘ia e ola pea i le Uga’ ma ia e maua tagata na fasiotia lo’u tama lelei, ma ia e matu’a taui i ai. Na fa’alogologo tagata uma, ma ua latou iloa, o le ‘Uga’ o le Aitu faa-le-aiga lea tama’ita’i, e le taumate o le a vave fa’ao’o mai ai le malaia i’e na mafua ai ona fasiotia Mata’utia Fa’atulou.

TALA IA TUIA’ANA TAMALELAGI, SO’OAEMALELAGI LEVALASI MA SALAMASINA: O TAUA O PAPA E FA A NAFANUA MA TUPA’I VAILILIGI

PAPA OLE TUIA’ANA:
Na tau’tu le fale o Tutuila ma Ape ia Tuia’ana Vaema ile tama’ita’i o Vaeotamasoa, ina ua le fagaina o i la’ua ile feti’i nai Amoa. Ona fai lea ole fa’atonuga a Leulu i Faga ia tei la’ua. Na la o mai lea ua ta’utu lo la fale. Ona le talia ina lea Tuia’ana Vaema, e inoino le tama’ita’i ile vae o le Ali’i ona e pupula. Ona toe o ai lea o Tutuila ma Ape ua aumai Tuia’ana Tagaloa Selaginato, le atali’i o Tagaloafa’aofonu’u le tama a le afafine o Letufuga. Ona ta’utu ai lea o lo la fale ona fa’ato’a talia ai lea. Ona to ai lea ole tama’ita’í. O le mea lena na fa’atonu ai Tutuila ma Ape i Taelegalolo’o, ina ua la o atu e gaoi mai le tama ina ua fa’ato’a fanau. Ona gaoi mai lea o le tama, tu’u i Fasitoo’uta. O ona po na ina ua gaoi mai le tama sa fai ai ta’ua tele o Ape ma Tutuila, ma Safata ile tuasivi. Ole ta’ua fo’i lena na taua ai Lio e ana le aveave. Ona fai ai lea o lo la luma’ava ma lo la Ali’i.Ua tele taeao e le maua atu se ava e Tutuila, ona fa’apea lea o Tutuila e lelei ona si’i ole tama i Sanamea’uta. Ona si’i mai lea iai o le tama, ona maua ai lea o le igoa o lena nu’u ia “Nofoali’i”, ona ua nofo ai le Ali’i. Ua tele fo’i taeao ua le maua a’e lava e Tutuila se ava ole taeao. Ona fa’apea lea ai lea o la manatu, e lelei ona ave o le tama i lalo i Matatao. Ona si’i ai lea ole tama, ona avatu lea ua vala’aulia e Alapia ma Suluga ile malae o Vavau ona afe ai lea. Ona fa’apea lea o Alapia ma Suluga, aumaia lo lua Ali’i mate tausia. Ona fa’apea atu lea o Tutuila ia Ape, ua ave le tama i Matatao. Ae tali atu Apemoemanatunatu, tu’uia lo ta Ali’i i inei ile Tumua ma o ia fo’i e pule ile Papa. Ona tu’u ai lea ole tama, ua fau ai ona ulumoega, ona fa’ato’a igoa ai lea ole Malae o Vavau ia Leulumoega. Ona ole ulumoega o Tamalelagi. Ole mea na igoa ai lenei ali’i ia Tamalelagi, au’a na aumai ina ua fa’ato’a fanau mai ile manava o lona tina, e le’i susu o ia. Sa fafaga i talo ma niu, o le mea lea na ola ai o ia. O ona po na o nofo Saga’ate i Malae ole vavau o igoa ia Tuiana’a. O potopoto fo’i iai itu’aiga e fitu, na o Sausi lava ma Samoa o tausia Tamalelagi. Ua matua le tama, ona alaga lea e Alapia ma Suluga o Tamalelagi ile Papa.

Ua lua Tuia’ana ia Leulumoega. O le masani ua fai e Leulumoega i na aso, ua ave lava mea ai lelei ia Saga’ate, ae ave mea ai leaga ia Tamalelagi. Ona fa’apea lea o Tamalelagi ia So’oaemalelagi Levalasi, sau ina alu i Savai’i i Tausunu ma Ta’uasa’otasi, fai ia Nafanua ia alofa mai i lo ta tiga. Ua ave lava mea ai lelei ma Saga’ate, ae au mai mea ai leaga ma ta’ua. Ona alu ai lea o Soo’aemalelagi Lavalasi i Savai’i, ona talia ai lea e Nafanua. Sau ina alu, e si’i atu i ie e lima le ta’ua. A fai, ae ai ni ai o lena ta’ua, ia tutu’i le alafale i’u mai Papa, ae aua ne’i nofo ai se Tupa’i, au’a oe le tama’ita’i. Ona sau ai lea o itu’taua a Tamalelagi, ona tau ai lea ole taua ua to’ilalo Saga’ate a ua tu’u le Malo ia Tamalelagi. E leai lava nisi na filifili ile alagaina o le Papa, na o Alapia lava ma Suluga e pule ai. O lena Papa ua ave e Nafanua, ae ua nofo lava Tamalelagi ua leai se Papa o iai, na ole Malo lava ua savali i A’ana uma.

PAPA OLE TUIATUA:
Ona sau fo’i lea ole feau a Tui-atua Foganiutea e alu atu Tupa’i e tau le taua , o lo’o fai lo la va ma Tui-atua Fogaoloula. Ona fai atu lea o Tupa’i, se’i ou alu muamua e ta’u ia Nafanua le tagi a Tui-atua Foganiutea. Ona fai atu lea o Nafanua, o ia ina tau le taua a fa’apea e maua se Malo ia tutu’i le alafale i Pulema’ava, ae nofo ai Tupa’i e fai ma nofoa sa ole Tui-atua. Ona tau fo’i lea ole taua malo Tui-atua Foganiutea, ae to’ilalo Tui-atua Fogaoloula. Ona ave fo’i lea o le Papa ole Tui-atua e Nafanua i Savai’i.

PAPA OLE GATOAITELE:
Ona alu fo’i lea ole feau a Gatoaitele ia aumai ni au e tau le taua i Malie. Ona faimai lea o le tali a Tupa’i, ou te le alu atu se’i muamua ona logo Nafanua i Salafai. Ona o ai lea i Savai’i ona fai atu lea o Tupa’i ia Nafanua, ae tali mai Nafanua. O ina tau le ta’ua, o upu ua uma na faia ma Gatoaitele. Ae a malo la tatou itu’taua, tutu’i le alafale i Tanumafili e nofo ai Tupa’i e talia le tanoa, ae tuvaofono Tuisamau i Malie, ae au’a nei tuvao se fono e Auimatagi. Ona tau lea ole taua, ua to’ilalo Malietoa ma Auimatagi ae malo Gatoaitele ma Tuisamau. Ua avea fo’i le Gatoaitele e Nafanua i Savai’i, ae ua na’o lona Malo ua savali ile Tuamasaga.

PAPA OLE VAETAMASOALII:
Ona sau fo’i lea ole tagi a Satunumafono ia Tupa’i e avatu au ole taua e faia lona tiga i lo la va male alataua. Ona fa’apea mai lea o Tupa’i, se’í muamua ona logo Nafanua i Salafai pe finagalo iai pe leai. Ona alu lea o Tupa’i i Savai’i ma ta’u atu ia Nafanua le tagi a Satunumafono i lona tiga. Ona faimai lea o Nafanua, o ina tau le taua a fa’apea ua maua se malo, tutu’i le alafale i Niusuatia-le-manu, nofo ai Tupa’i e leo ai ile alafale e fai ma agatonu o Satunumafono. Ona tau lea ole taua to’ilalo le alataua, ae tu le Malo o Satunumafono. Ona ave ai lea ole Papa ole Tamasoali’i i Savai’i ia Nafanua, a ua savali le Malo o Satunumafono ile Alataua. O le Malo fo’i lena na alu ai Imoa e tali pisi ia le alataua. O le mea fo’i lea fa’ato’a ta’u ai Imoa, ole pitolua o Satunumafono.

OLE E’E O PAPA E FA IA SO’OAEMALELAGI LEVALASI: SALAMASINA:
O Papa o Tumua ua potopoto i Fili ma Puletu’u i Savai’i. Ona o’o lea i le tasi aso, ua fa’apea atu Nafanua ia Tupa’i. Omai ina ave Papa ia So’oaemalelagi Levalasi i Leulumoega, ae se’i taunu’u lau upu na fai atu. E tutu’i le alafale i Leulumoega e igoa ia I’u mai Papa, o le a I’u nei Papa ia Leulumoega. Ona tali atu lea o Tupa’i, ua lelei. Ae se’i o ma asia le tama’ita’i pe sea lona finagalo, ae sili mea ole se’uga o le a fai nei i Safe’e, ona fa’ato’a fai lea o na upu. Ona o mai ai lea o Tupa’i e asi mai So’oaemalelagi Levalasi i Leulumoega. Ona fai atu lea o Tupa’i ia So’oaemalelagi Levalasi, tau mamao le teine lena ia te oe, aua le solia Oe. A’ua ua lata ona aumai o Pa’ia ia te oe, ua fai mai ai Nafanua. Ona fa’apea lea ole tama’ita’i, ia a ave i fea si’au tama? Oute alofa tele i si’au tama. Ona fo’i lea o Tupa’i i Savai’i,ua alu atu loa fai le se’uga i Safe’e. Ona sili lea o mea seu ina ua i’u le se’uga.

Ona o mai lea o Tupa’i ma Auva’a ua taunu’u i Leulumoega ia So’oaemalelagi Levalasi, ave ese ia le teine maou tuata’afalu o le a avatu Pa’ia. Ae fa’apea le upu a So’oaemalelagi Levalasi, ave ea ifea si’au tama. Oute alofa tele i si’au tama. Ona fai atu lea o Tupa’i, e te loto ea ina avatu o Papa i si’au tama? Tali le tama’ita’i; Oute loto lava iai, au’a e tele lo’u alofa i si’au tama. Ona ave loa lea o Papa ia Leulumoega nate faae’e ia Salamasina. Ona tautu lea ole fale o Leifi ma Tautolo ia Matauti’a ile tama’ita’i o So’oaemalelagi Levalasi. Ona nofo ai lea So’oaemalelagi Levalasi ia Tui-atua Mata’utia Fa’atulou. O le aumoega lenei e iai le upu fa’asamoa o faia nei, “tau ose mea e ala ai”. O le aumoega lenei fa’atoa maua ai le igoa o Mata’utia: Mata’utia Fa’atulou. Ona ma’itaga ai lea o So’oaemalelagi Levalasi ia Mata’utia, ua fanau le tama’ita’i e le au le tama ua na ose alualutoto. Ona solo sui ai lea o Tumua i Lufilufi e fai ma sui o Tuimavave ina ua le au. Ae ave ai Salamasina ma sui a Leulumoega, e avea ma sui ua iai lava Papa. Ona potopoto ai lea o Tumua uma ile tupu tafa’ifa o Salamasina.

OLE MAFUA’AGA O LE SUAFA TALAMAIVAO/ULUALOFAIGA

Ina ua agaleagaina le tina o Salamasina o Vaetoefaga e Leulumoega, ona ave ai lea o le feau a Salamasina i Fagaloa i le tuagane o Vaetoefaga, o Ulualofaiga. Ua agaleagaina lona tuafafine e Tuia’ana Tamalelagi ma Leulumoega. E taunu’u atu le tala oi le vao Ulualofaiga, ona maua ai lea o le suafa o Ulualofaiga o le “Talamaivao”. Ona e taunu’u atu le savali a Salamasina ma le tala, oi le vao Ulualofaiga. Ona malaga ai lea o Ulualofaiga i Leulumoega ma tagata Fagaloa e to’alua. O Pa’ila ma Aiofaiva, o tautai e tautuaina Vaetoefaga ina ua agaleagaina e Tamalelagi ma Leulumoega. E iai ona iai suafa ia e lua i Nofoali’i, e o’o mai ile aso.

Ona toe alu fo’i lea o le savali a Salamasina ia Peseta i Safune o Savai’i . Ona aumai ai lea e Peseta o tagata e to’alua, o Tauti ma Mala’itai e tautuaina Vaetoefaga. Ina ua tu’umalo Vaetoefaga, ona manatu lea o Mala’itai o le’a toe fo’i mo Safune. Ona toe fo’i lea o Mala’itai i Safune, ae o lo’o iai pea Tauti i Nofoalii e o’o mai ilea so.
(Tulafale: Pa’ila ma Ai’ofaiva. Tapa’au: Tauti ma Mala’itai.)

OLE TALA I LE MAFUA’AGA OLE TUIATUA FA’ANOFONOFO

Usu #29 Tuiatua Polailevao ia Momoeifuifatu le afafine o Pa’u i Safotulafai faaee le gafa o #30 Tuiatua Fotu’itama’i.
Ona tau loa lea o taua i le tuaoi o Atua, ua to’a fa Tuiatua: #31 Tuiatua Toeta, #32 Tuiatua Samo, #33 Tuiatua Leteleipesega #34 Tuiatua Vaiotui, o lea e iai alaga’upu e fa’apea isi: “O Atua Le Tonu”, ” O Atua Le Faiga”, “O Atua Le Auliuli”.

Sa autasi le Tuiatua ile paepae i mailei i Aleipata, ile pule a Leifi ma Tautolo. Ona o’o mai lea ile nofo a Tuiatua Fotu’itama’i, ona aumoe ai lea o Tuiatua Fotu’itama’i ile Ao ole Tuiatua, o tagata ma lauele’ele o Aleipata. I le fia fai’ava ile tama’ita’i o Leteleipesega le alo o Mata’afa Laululoloa i Faleata. Na Tuiatua uma alo o Mata’afa Laululoloa, ole tama’ita’i o Leteleipesega ma ona tuagane o Toeta, Samo ma Vaeotui. O Tuiatua ia e fa i Faleata i lea lava taimi. O Tuiatua Toeta na mana’o e fai lona Fusi i Sataoa i Safata. O Aleipata na o latou faia lea Fusi, e pei ona mana’o iai Tuiatua Toeta. O le pine lena e fa’amaonia ai le pule a Faleata ile Ao ole Tuiatua, o tagata ma lauele’ele o Aleipata. Ona mana’o mai fo’i lea o Tuiatua Samo ia faia lona Ti’a i Lefatu, e tu ai ma maimoa ile laulelei o Amoa. Ona o mai lea o tagata mai Aleipata ma la’u mai ma’a, e fai ai le Ti’a o Tuiatua Samo i Lefatu. O lo’o iai pea ma’a o lea ti’a ile tolotolo i Lefatu. O ma’a o Lenei Tia, e la’u atu i Aleipata. E tau amo mai i ua ma’a. Ona o’o mai lea ole amoga ma’a i gauta o Aufaga, ona isa ai lea ele lo’omatua Aufaga, Isa! E leai ni ga’au o nei mea. Ona lafo ai lea ole amoga ma’a a Aleipata, ona fa’aigoa ai lea o lena ele’ele i gauta o Aufaga o “LAFOGAMA’A”, o lo’o iai lava ma’a i lea ele’ele e o’o mai i aso nei. Ona toe fo’i lea o Leifi ma Tautolo ma Aleipata, i Aleipata. Ona taunu’u lea i Aleipata o Leifi ma Tautolo fono loa, o le a si’i le taua i Faleata. Ona maua lea ole finagalo o Leifi ma Tautolo, o le a logo uso. O upu o Atua o Leifi ma Tautolo o Ao ia o Atua, a’o Falefa o uso o Atua, o Falealili o i’u o Atua. O le mea lea na autasi ai Leifi ma Tautolo ma Aleipata, o le a logo uso, ma i’u o Atua ae si’i le taua i Faleata e toe fia maua mai le Ao ole Tuiatua. Ona Malaga lea o Leifi, Tautolo, ma Aleipata e logo uso. Ae te’ena e Falefa, ona toe Malaga ai lea e logo i’u, e te’ena fo’i e Falealili.

O lenei Malaga e alu ma usu la latou pese e fa’apea; Sia-sia-umue! Sia-sia-tu! Ua taunu’u atu i Sapo’e i Falealili le malaga o usu pea la latou pese, ona tali a’e lea ole tagata i Sapo’e, Sia-sia-tau! Ua tilotilo atu iai Aleipata ile fale o sau ai le vala’au, e leai se tagata oi iai. Ua nofo le tulafale Sapo’e o Letoga le igoa, ua avane le launiu ua fili fa’atasi ai ia ma le pou ole fale. O le mafua’aga lea o lo’o iai le upu e faia i lea tulafale “O LETOGA-LE-FAI-ALAGA” e o’o mai i aso nei. O na sau lava lea ole solo ua toe fo’i i Aleipata, ma usu mai la latou pese Sia-sia-umue, Sia-sia-tu se’ia o’o mai i VAIPALOA i Sasa’e o MATA’TUFU. O iai le tagata e igoa ia FALEPUAVAVE, o usu pea la latou pese, Sia-Sia-umue! Sia-Sia-tu! Ona tali atu lea o Falepuavave, Sia-sia-tau! Ona afe ai lea o Leifi ma Tautolo ma Aleipata, ile fale o Falepuavave. Ona sau ai lea ole tulafale o Letoga i Sapo’e ma lona ava e tuli loa mai Leifi ma Tautolo ma Aleipata, E taunu’u mai Letoga i Vaipaloa ua talia e Falepuavave le mana’o o Leifi ma Tautolo. Ona palasi ai lea o Letoga ma tu’itu’i lona ava, o lo’o igoa ai lenei ele’ele o “TU’IGA’AVA”. Ona fa’apea atu lea o Falepuavave ia Leifi ma Tautolo, O! ina fola lo lua fale ile paepae o mailei, ona lua fo’i mai lea, si’i le taua i Faleata. Ua lanoga e Falepuavave ua lalata mai au a Tuiatua Vaeotui. Ae ua le alu Leifi e fola lo laua fala ile paepae i mailei, e tusa ole fa’atonu atu a Falepuavave. Ua fa’apea atu Leifi ia Falepuavave, o ia ua ma’i mata. Ona fa’apea atu lea o Falepuavave ile aualuma e o ane, e fai lo latou poula ma Leifi. Ona sola loa lea o Falepuavave e fa’afetaia’i au a Faleata. Ona fetaia’i lea o Falepuavave ma au a Faleata ile VAITELE i gauta o LOTOFAGA ua igoa ai i aso nei. Ona tau ai lea o lo latou taua. Ua te’ega lava au a Faleata, se’ia la’asia le tasi vai. Ona iloa atu lea e Falepuavave ole fata, o tu ai iluga Tuiatua Vaeotui. Ona a’e lea iai o Falepuavave ma ua ia sala le Ao o Tuiatua Vaeotui, ua alu ifo ma ia i lalo. E tu ifo loa Falepuavave ile ele’ele ae fa’alogoina loa le gasese ole vai, ose tagata o asa le vai. Ona iloa atu lea e Falepuavave o Leifi o asa’asa mai ile vai, ona igoa ai lea o lea vai o “VAIGASESE” e o’o mai i aso nei. ONA FA’APEA ATU LEA O FALEPUAVAVE IA LEIFI, SAU IA! UA E TUAI MAI, AE SAU INA ALU MA LOU TUIATUA-FA’ANOFONOFO, AE O LE A OU TUIATUA-FA’ASAVALI. O lo’o fa’alupe nei pea Tafua ma Fuataga ole Tuiatuafa’anofonofo. Ole suafa Mata’afa o le tama lena a Aiga Salevalasi.

O Falepuavave e sau mai le gafa o Tuiatua Polailevao. Ona aumai ai lea o Togia’i o Fagaloa ua e’e iai le Tuiatua i Mulifusi Lotofaga. Ole fata maia fa’asavali ole Tuiatua Togia’i mai Fagaloa ua fia inu ona a’e ai lea o Leota i le niu, maua ai lona matupalapala a fonoa Atua e inu muamua le niu e Leota ona fa’ato’a amata lea ole fono. Ona ala’ala ai lea o Tuiatua Togia’i i Lotofaga ma lona tuafafine o Sefa’atauemaga. Ma fai ai ma sa’o tama’ita’i i le Tuiatua. Ona usu mai lea o Lalovimama le alo o Sanalala Le Manu’a ia Sefa’atauemaga, faaee le gafa o Tuiatua Mata’utia Fa’atulou. Ina ua maliu fa’afuase’i o Tuiatua Mata’utia Fa’atulou, na tau fai suafa ai lea ile Papa ole Tuiatua o Tuiatua Fogaolo’ula o Lufilufi ma Tuiatua Foganiutea o Fagaloa tai. Ona tau ai lea o le taua, lea na si’i tau mai ai Nafanua ma Tupa’i(Vaililigi).

TALA I LE MAFUA’AGA UA ALI’ITA’I AI FALEATA I LE SUAFA FAUMUINA

Ua maliu Tuia’ana Faumuina le Tupufia ona tau ai lea o le taua ina ua fia tupu uma le fanau a Faumuina, e iai Fonoti, o le teine o Samala’ulu, ma Va’afusuaga Tole’afoa; Ole “Tupufia a Tuia’ana Faumuina”.

Ona papae ai lea o lo latou taua i Leulumoega. Ua uma le taua ua manumalo Fonoti ma avea ma Tupu Tafa’ifa o Samoa. Ona finagalo ai lea o le tupu e fia asia le itumalo o Faleata. Ona o le tasi lenei o itumalo na tau malosi i le itutaua a le Tupu o Fonoti. O Fonoti o lona tina Manalelei po’o Talaleomalie, o Manalelei Talaleomalie o lona tina Aloalonei, o Aloalonei o lona tina Unusialetoa, o Unusialetoa o lona tina Letele-o-Talaia le alo o Mata’afa o Ululoloa i Faleata, o le fai’a lea a Fonoti le Tupu ma Faleata i lena vaitau o le soifuaga.

Na malaga ai lea o le Tupu o Fonoti i Faleata. O iai i Vaimoso le tagata malosi ma le toa lenei e igoa ia Tiufea. Ona alu ane ai lea o Tiufea ia Fonoti ma lana manulele. Ua fa’alele manu nei le Tupu o Fonoti ma Tiufea. Ua fa’alele e le Tupu o Fonoti le manulele a Tiufea, ua lele aluga ma ifo mai ma tu i le a’ao o le Tupu. Ona fa’alele lea e Tiufea o lana manulele, ua na ona apata e fia lele ma pa’u mai ua tu i le ua o Tiufea. Ua fa’apea lava ona faia e le manulele le apata e fia lele, ma pa’u mai ma tu i le ua o Tiufea.

Ona malele lea o le Tupu o Fonoti ia Tiufea ma Faleata a’o potopoto iai ma le Tupu e fa’apea: “Tiufea! Tu’u lou igoa o Tiufea, ae o le a e igoa ia ‘MANULELEUA’ e manatua ai pea e Faleata lenei lava aso.” O lona tau, O le’a ou UNE lou Ao o le MATA’AFA i ATUA. Ae aumai le suafa o lo’u tama o FAUMUINA ete Ali’ita’i iai (FALEATA).
O to’oto’o fo’i ia o i Faleata Sasa’e ua fa iai to’oto’o o Faleata e o’o mai i aso nei. “Puni loa le Mata’afa, ae puni matatogo Faleata”.

GAFA O MANALELEI PO O TALALEOMALIE LE TINA O FONOTI LE TUPU:
1. Usuia Popoai e le Tui-Toga, faaee le gafa o Togialelei, ma Tuiavi’i.
2. Usu #2 ia Tuiavi’i ia Letele Talaeia le afafine o Mata’afa i Ululoloa Faleata, fa’aee le gafa o Taua’aletoa (tama), ma Unisialetoa (teine).
3. Usuia Unisialetoa e Malietoa Sa o Mulifanua, fa’aee le gafa o Togia, Ifopo, ma Aloalonei (teine).
4. Usuia Aloalonei e Vaovasa o Gataivai i Savaii, fa’aee le gafa o Manalelei (teine: po’o Talaleomalie).
5. Usuia Manalelei po’o Talaleomalie e Tuia’ana Faumuina Le Tupufia, fa’aee le gafa o Fonoti le Tupu Tafa’ifa o Samoa.

TALA OLE MAFUA’AGA O FENUNUTI MA LEATUAVAO MA MATUA MAVAE O SA-TUALA

Ona usu lea o Fonoti Tupu Tafa’ifa ia Fuatino le alo o To’alepai o Satapuala ole Aiga Satuala, faaee le gafa o le Alii o Muagututi’a. Toe usu Fonoti Tupu Tafa’ifa ia Taele’asa’asa le alo o Tautaiolefue o Lealatele i Savai’i ole Aiga Satuala, faaee le gafa o le teine o Falegaoti. O nei lava gafa e tau uma i le Tui-A’ana; e iai le muagagana e fa’apea: “O le gafa o Tui-A’ana ua so’o.”

Mafua’aga Ua Avea Ai Fenunuti Ma Leatuavao o Falese’ela ma Matua Mavae o Le Aiga Sa-Tuala. O le matupalapala po’o le mavaega a le Tupu o Fonoti ile fa’aeaea a Fenunuti ma Leatuavao.

E tele oloa ma mea taua a le Malo o Samoa, a’o le oloa sili na taua, e le ma fa’ataulia, o I’e o le Malo la ia. O le Malo o Samoa i anamua, e na’o le ono lava I’e o le Malo sa iai. O le tasi o nei I’e o le Malo e igoa o le “Gogotagi”. O lenei I’e sa lalagaina e Pu’aloa le alofafine o Tusa le tulafale lauiloa o Lufilufi. O lenei galuega fita sa faia lea i le ulufanua e igoa ia Va’aua i gauta o Lufilufi. E tele ni tausaga sa lalagaina ai lenei I’e ae sa fa’ai’u ina lava ma le manuia, ma sa matagofie tele lea I’e. O le aoauli o le tasi aso na fa’ai’u ai lenei galuega, o le taimi tonu lava na fa’auma ai le matalalaga mulimuli, na fa’alogo ina ai le tagi leo tele o le manulele o le Gogo i luga o le fale sa fai ai lea galuega. Sa tele le fiafia o le teine i le iloilo va’ai o le fa’aumaina o lana I’e, o lea sa ia fa’apea atu ai, ua maua le igoa o la’u I’e, o le “Gogotagi”.

Usuia Pu’aloa e le ali’i o Samaila mai Falese’ela, faaee le gafa o Samaila Ia Futi (tama), ma Avegatoloa (teine).
Usuia Avegatoloa e Malufaitoaga o le Aiga Satuala, faaee le gafa o Fenunuti (tama).
Usu Fenunuti ia Uituafanua le alo o Tailau, faaee le gafa o Sinamulivanuiana (teine).
Toe usu Fenunuti ia Tinovao le alo o Lotuanu’u, faaee le gafa o Tautaiolefue (tama), ma Mauailegalu (teine).
Toe usu Fenunuti ia Fitiotagia le alo o Ausalilo, faaee le gafa o Leatuavao (tama)
Usuia Sinamulivanuiana-Seutuimanu’a e To’alepaiali’i mai Satapuala, faaee le gafa o Su’afaiga (tama), Laumatalelei (teine), Fuatino (teine), ma Melegalenu’u (teine).
Usuia Fuatino e le Tupu Tafa’ifa o Fonoti, faaee le gafa o Muagututi’a (tama).

Ina ua uma ona faae’e e Leulumoega Papa o le Tuia’ana ia Fonoti, na avea le ali’i ma tupu; na faae’e fo’i ia te ia le Tuiatua, Gatoaitele ma le Vaetamasoali’i, ua Tupu Tafa’ifa nei Fonoti. Ona fai lea o le aotelega o I’e o le Papa a le aiga Satuala e tali atu ai I’e o le Papa ia Leulumoega e tusa ai ma Papa o le Tuia’ana na e’e i le latou tama. Sa tele ni I’e lelei o le aotelega, a’o le I’e na silisili le matagofie, o le I’e lea o le tama o le tina o Fuatino ma le tuagane o le tina o Fuatino, o Fenunuti ma Leatuavao. O le I’e lea na fai a’i o le papa na tali atu ia Leulumoega mo le Papa o le Tuia’ana. Sa tele le fiafia a le To’aiva (Leulumoega) i le matagofie o le I’e na fai a’i I’e. O le agaga fiafia lea sa va’aia i le tupu o Fonoti, ma ua avea ai ma tulaga ese i le nofo i le fa’afeagaiga ma le to’aiva. O lea sa ia manatua ai le fa’aeaea a Fenunuti ma Leatuavao le aiga a lona masiofo, e pei o le tasi fetalaiga ‘E Manatua Pule Ae Le Manatua Fa’alaeo’. O le pogai lea na liliu a’e loa ai le Tofa Mamao i Lana Afioga le Tupu, ma pa’u ai lana malelega i lona aiga Satuala a’o potopoto i lona Maota i Nu’uausala e fa’apea; ‘Fa’afetai Fenunuti ma Leatuavao i lo Oulua Fa’aeaea, ‘O Lea Ia Amata Atu I Le Aso Nei, ‘Na Avea Oulua Ma Matua Mavae O Le Aiga Satuala.

E TA’AALO TAMA A’O SE USO: MUAGUTUTI’A MA APUTIPUTITOLOULA

A’o gasegase pea le Tupu Tafa’ifa o Fonoti i Mulinu’u Lalogafu’afu’a ma Sepolataemo, sa malaga atu le tama o Aputiputiatoloula ma lona tina o Melegalenu’u e asi le fa’atafa o Fonoti le Tupu, ma sa fa’apea lava fo’i le tele o le atunu’u sa gasolo i ai i le taimi lea. Fai mai sa potopoto ai Tumua e lipoi le gasegase o le Tupu. Na i ai fo’i Fuatino le masiofo a le Tupu fa’atasi ai ma lana tama o Muagututi’a le atali’i o Fonoti.

Ua Sa le Sami, Sa le Vao, Sa le Vanimonimo, Ua Pa’ia le Ele’ele. E Sa se isi ona pisa. O tama la nei o Muagututi’a ma Aputiputiatoloula, ua tusa ua ta’i iva o la tausaga le matutua, Ua o i fafo o le maota ma ta’aalo ai ma pisa e pei ona masani ai tamaiti. Sa le lelei i le fa’alogo a Tumua le pisapisao o tamaiti, ona isa lea e Tumua pe ua taofi fo’i. “Sole, aua le pisa o oulua gutu. E te lua iloa lea e fa’atafa le Tupu. Va’ai e leai se isi e toe pisa o la e tapua’i Tumua”. E maua ifo i le fa’afofoga a le Tupu le sai lea a Tumua, ona ia fesili lea: O ai ea na tamaiti e pisa? Ona tali lea o Tumua: O le ali’i lava lea o Muagututi’a ma Aputiputiatoloula, o fanau a Fuatino ma Melegalenu’u. Ona malele mai lea o le Tupu e fa’apea: Tumua, malie lo outou finagalo, aua le ta’ofia tamaiti ua fa’ato’a feiloa’i le uso. E ta’aalo tama a’o se uso.

Na ioe Tumua i le malelega a le Tupu e fa’apea: Muagututi’a, O le a e alu ma lou Muagututi’a, ma lou Fuatino, ma lou Faumuina ma lou Melegalenu’u. E te nofo i Mulifusi. E te tua ia Sa-Tuala, ae tausi oe e Leulumoega. Aputiputiatoloula, O le a e fo’i oe ma lou Muagututi’a ma lou Fuatino, ma lou Melegalenu’u ma lou Faumuina, ma lau igoaipu o le Fetaia’imauso, e fa’amanatu ai le aso lenei fa’ato’a fetaia’i ai oulua le uso.

E ta’aalo fo’i tama a o le uso. E tele isi mea ta’ua na maua mai e tagata i le na aso mai tofiga a le Tupu ina o le a maliu. O lea lava e o’o mai i le a’so ana tulaga mamalu. E le mafai ona suia ma o lo’o aga’i pea iai fa’aupuga a Samoa i ana mea e fai.

Ua fo’i nei Muagututi’a ma Aputiputiatoloula ma a la mea ua avatu i le Tupu, ma le agaga ua fa’atumulia i le fiafia. Manatua fo’i, na usu To’alepaiali’i ia Sinamulivanuiana Seuituimanu’a, le alo o Fenunuti ma Uituafanua lona faletua i Falese’ela; faaee le gafa o Fuatino, Melegalenu’u, Su’afaiga ma Laumatalelei. Usuia Melegalenu’u e Tau’iliili i Papa, fa’aee le gafa o Aputiputiatoloula.

Ua sau Aputiputiatoloula ma ana mea mai i le Tupu ona afe lea i lona tama o Tau’iliili. Ona fa’apea atu lea o Tau’iliili i lona atalii: Malo le Malaga. Ona fa’apea mai fo’i lea o le tama: ia malo fo’i le tapua’i ia oe le tama. Ona fai mai lea o Tau’iliili: O le a sau mea na e sau ma oe na maua mai i le Tupu na lua o iai ma lou tina i le aiga? Ona tali lea o Aputiputiatoloula; E i ai mea o lo’o ou sau ma a’u o mea fa’a-tupu mai le Tupu o Fonoti; O lo’u Muagututi’a, o lo’u Faumuina, o lo’u Fuatino, o lo’u Melegalenu’u, ma la’u igoaipu o le Fetaia’imauso, e fa’amanatu ai le fa’ato’a ma fetaia’i lea ma lo’u uso. Ona o le gasegase o le Tupu i Mulinu’u ma Sepolataemo na faia ai le mavaega lenei. Na fa’apea atu ai le tama i lona tama: E i ai se mea e te mana’o ai i a’u mea nei na ou sau ma a’u mai le Tupu? Ona tali lea o Tau’iliili; e pau lava le mea ou te mana’o ai, aumai lau igoaipu ma a’u, oute mana’o iai a’ua o lau igoaipu mai le Tupu. Fai mai le tama: Ua lelei.. E i ai ma se isi mea e te finagalo iai? Tali Tau’iliili: Aumai lau igoaipu o le Fetaia’imauso ma a’u, ae avatu la’u igoa-ipu o le Fonofili ma oe. ”O le ala lea o le taumafa o Tau’iliili i le igoaipu o le Fetaia’imauso, aua o le igoaipu na aumai i le Tupu“.

O LE MAVAEGA A FONOTI LE TUPU TAFA’IFA O SAMOA MA LONA USO O TOLE’AFOA

Na iloa atu e Tumua ua afio atu Tole’afoa, ona fai atu lea, afio mai i le Maota e te lua talatala ma le Tupu. Tali Tole’afoa, leai oute ava i Tumua, ua lava a’u i lalo o le ulu lea. Ae sa augani atu lona aiga ma Tumua, afio ane ia i le Maota. Na faofale loa Tole’afoa ma sa faa’alia lava lona fa’aaloalo ia Fonoti, ua faae’e o ia i le pou pepe o leisi tala o le Maota i Mulinu’u Lalogafu’afu’a ma Sepolata’emo i Lufilufi Atua.

Ona agiagi atu ai lea o le Tupu o Fonoti e fa’apea: Tole’afoa e, afio mai o le a totofi ata mea, au’a le nofo lelei ai o lau fanau ma la’u fanau i le lumana’i. O Papa e fa, o le a ia te a’u ma la’u fanau. A’o le Ao o le Tonumaipe’a, o le a ia te oe ma lau fanau. O le a e saofia le Aumaga, o le mea lea e ta’ua ai le Aumaga e Pa’ia, ona o le Ao o Tonumaipe’a ua iai. E te afio i le fala, Na’o oe lava e te nofo i le fala i fafo, E sa seisi o le Aumaga e nofo ise fala. A uma ona mama o le ava, e tu lava le tagata i luga ma lana maga’ava ma tu’u i le tanoa, a’o lau maga e tu mai se tasi na te avatua, ona aumai lea o le tanoa tu i ou luma. A leai se Tupu e alagaina e Tumua, O le a e Tuia’ana Ave’aumalaga! O le a fa’asino fo’i ia te oe upu o le Aualuma. O lou Aualuma o le a tausi e Leulumoega ma e na ta’i Fasito’otai ma Fasito’outa.

A e toe tago mai i a’u mea, e sauaina oe i le aufuefue ma soloa i le vailalo ma lau fanau. A ou tago atu i au mea ia fa’apea fo’i ona soloa a’u i le aufuefue ma tafea i le vailalo ma la’u fanau.

O le Mavaega lea nai i Mulinu’u Lalogafu’afu’a ma Sepolata’emo i Lufilufi Atua, a Fonoti le Tupu ma lona uso o Va’afusu’aga Tole’afoa. O lo’o tausi iai Samoa i lenei Mavaega e o’o mai i le aso.

Ole Tupu Tafa’ifa o Fonoti ma ona suli i lana mavaega. O Suafa ia i le Maota o Mulinu’u Lalogafu’afu’a ma Sepolata’emo i Lufilufi o Tumua Atua e o’o mai i le aso: o Fonoti, Muagututi’a, Seuta’atia, Nofoatolu, ma le Papa o le Tui-Atua. – Fonoti o Lotofaga i le Aiga Pa’ia o Salevalasi i Lotofaga Atua.

1. Usu #1 Fonoti le Tupu Tafa’ifa ia Fuatino le alo o To’alepaiali’i i Satapuala Aiga Satuala, fa’aee le gafa: o Muagututi’a (tama ulumatua ‘O le Alii o aiga’).
2. Usu #1 Muagututi’a ia Poto le alo Amituana’amanaia o Si’ufaitoto’a i Faleata, fa’aee le gafa: o Seutaatia (teine ulumatua ‘Feagaiga ale Aiga’ Na tofia e ala’ala I le Maota o Mulinu’u Lalogafu’afu’a ma Sepolata’emo i Lufilufi o Tumua Atua).
3. Usuia Seutaatia o Mulinu’u i Lufilufi e Lilomaiava Nailevai’iliili o Palauli i Savai’i, fa’aee le gafa: o Nofoa-tolu Lilomaiava Vae-ole-nofoa-fia (tama: Ulua’i suafa “Nofoatolu” lea na e’e ile Maota o Mulinu’u Lalogafu’afu’a ma Sepolata’emo i Lufilufi o Tumua Atua.).
4. Usu Nofoatolu Lilomaiava Vaeolenofoafia ia Sinaivaiana le alo o Va’afusuaga o Faga i Savai’i, fa’aee le gafa: o Fonoti Nofoatolu Laufeti’iti’i (tama: Fonoti o Lotofaga Atua. Toe nofoia mai o le Suafa o Fonoti le Tupu Tafa’ifa o Samoa nai le Maota o Mulinu’u Lalogafu’afu’a ma Sepolata’emo i Lufilufi o Tumua Atua).
5. Usu Fonoti Nofoatolu Laufeti’iti’i o Mulinu’u i Lufilufi ia Va’asa le alo o Fiame Muagututi’a le Sa’ofaapito ma le Aiga Pa’ia o Salevalasi i Lotofaga Atua, fa’aee le gafa: o Fonoti Oliovaigafa (tama ulumatua ‘O le Alii o aiga’), Nofoatolu Ti’auliva’a (i), ma Lagouta (teine). – [Sa-Fonoti o Lotofaga Atua]
(O Fonoti Oliovaigafa na ai Ali’i mai iai Molio’o ma le Ailaoa e fai ma o latou Ali’i e iai le ulua’i Suafa Fonoti sa ala’ala i lona Maota o ‘Vainiu’ i Faleapuna. Na maliu ai lava le Ali’i ma sa lagomau ai lava. E pa, e leai sona suli. Ae fa’asolo le Suafa ma le gafa o Fonoti le Tupu Tafa’ifa i Lotofaga Atua i suli o Nofoatolu Ti’auliva’a, ma le teine o Lagouta).

O le Fonoti a le Aiga SaFonoti o Lotofaga Atua 2016: Ole tofa le Afioga o Fonoti Tagaloamamana Inu Tulo Brown o Lotofaga ma le Aiga Pa’ia o SaLevalasi i Lotofaga Atua.

O Tupu Tafa’ifa o Samoa o Salamasina ma Fonoti o lo’o lagomau i le Aiga Pa’ia o Sa-Levalasi i Mulifusi ma Tanumaleu, po’o le Malae o Papa i Lotofaga, Atua.

(“e ufiufi a le tama’imoa i le tanoa, ae ioio lava..”)

Levalasi So'oaemalelagi (Fa'avae ole Aiga Sa-Levalasi) and Queen Salamasina the first Tupu Tafa'ifa of Samoa: Aiga Pa'ia o Sa-Levalasi.

~ by Christian Brown on July 30, 2009.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: