O Le Mavaega A Fonoti Le Tupu Tafa’ifa O Samoa Ma Lona Uso O Tole’afoa

LE MAVAEGA A FONOTI LE TUPU TAFA’IFA O SAMOA

SOURCE:
Molimauina ma tusia e Hon Leota Leuluai’ali’i Ituau Ale.

O LE NOFOAIGA A FONOTI LE TUPU PO O LE TAUSAGA E 1690 A.D. “Ia manatua Fa’atoa ta’ua lava le tagata O LE TUPU, pe afai UA UMA ONA MAE’A NA E’E IAI PAPA E FA! – Tuiatua, Tuia’ana, Gato’aitele, ma le Vaetamasoa’alii.” Na gata ia Salamasina le ulu’ai Tafa’ifa, pe o le tausaga e 1570.

1570: Salamasina (Tupu Tafa’ifa.)
1600: Fofoaivao’ese, ma Tapulesatele.
1630: Taufau, Sina, ma Asomua Lemalama.
1660: Faumuina, Fonoti, Va’afusu’aga Tole’afoa, ma Samala’ulu.
1690: Fonoti Le Tupu (Tupu Tafa’ifa.)
1720: Muagututi’a.
1750: Tupua Fuiava’iliili (Tama-A-Aiga.)

Atonu e le atoatoa ona sa’o, ae peita’i ua matu’a lalata iai le sa’o e tau fa’amalamalama ai le fa’atulagaga ma le fa’asologa o auganofo o e sa fa’a’Ao iai Faigamalo anamua a Atua ma A’ana. Tanoa ia le Tuamasaga ia, UA MANINO LAVA LE FA’ASOLO O NOFO I LE SUAFA MALIETOA, o lo’o fa’asolo lava ma fulisia i suli soso’o. Silasila fo’i i le fa’ata’ita’iga sili lea ona vave malamalama ai i lea itu taua tele:- Malietoa Vai’inupo Tavita, Malietoa Moli, Malietoa Laupepa, Malietoa Tanumafili, Malietoa Tanumafili (ii).

1780: Galumalemana – E ana le To’alima o Aloali’i.
1810: Nofoasaefa – Na iloga lona sau’a ma le amio pa’a’a ma le le popoi. Na toe ta’oto ia Sauimalae.
1840: I’amafana – Na e’e iai Papa o le Tuiatua ma le Tuia’ana.

Ia silasila la ia I’amafana ua soifua i le taimi o Malietoa Vai’inupo (Tavita) lea na ia talia le Lotu (L.M.S.) i le 1830 ia Aukuso.

O le isi itu taua lava e ao ona aua ne’i galo, e fa’apea nisi o le mafua’aga o le taua o le Paegauo a Fonoti ma lona tuafafine o Samala’ulu, ma le atalii o lona uso, ona o le I’etoga a lo latou tama o Faumuina. Faimai le mau a isi e mana’o Tole’afoa Va’afusu’aga e ave le I’e o le Pepeve’a ia Samala’ulu nate teuina, ae musu Fonoti. O ia e matua e tatau ona ia te ia le I’e a lo latou tama.

A’o la’u mau ma la’u saili’iliga oute taofi fa’apenei..

0 le a fa’apefea lava ona masa’a le toto o Samoa i lenei taua ona o le I’etoga? E ioe le manatu o le “Measina” o le Pepeve’a mae matua ta’ua tele i finagalo o tagata Samoa. Ae oute taofi malosi o le pogai o le TAUA O LE PAEGAUO, O LE TAUA LAVA PO’O AI O LE A E’E IAI PAPA! Ioe, o le vevesiga ma le a’afia uma ai o Upolu ma Savai’i, ona po’o ai o le a TUPU..!? Ia ua malamalama ma ioeina i lenei fa-selau (400) tausaga taluai, tele pe ititi, O LE TAUA O LE PAEGAUO, O LE TAUA O PAPA! Ma na manumalo Fonoti ona o le tulaga fulisia o Samoa sa lagolago ia teia. E oso vave mai i le mafaufau Faleata, le Polatai’a o Tofaeono ma le lagolago a le Vaimauga, le au mai o Asiata, ma le vaevae ina o A’ana au’a e le’i tasi i se tagata. “E ui lava la ina to’ilalo Tole’afoa ma Samala’ulu, ae na maua lava tofi ma fa’amanuiaga O A’ana! “Ae, o laua na Fausia?”

Ae a fa’apefea le nofonofovaleane a Aiono? Silasila la i le tele o mea na tutupu i le taua o le Paegauo i A’ana!

Na i’u lava ina fe’ausi Satunumafono e fautuaina le latou tama o Tole’afoa e afio mai se’i talatala ma Fonoti ona ua ali’i matua, ma ua gasegase le Tupu. Ua fia faia lava le leleiga i lo la va, AE LE’I GASOLOSOLO AO MA TA’APE PAPA i le TUPU O FONOTI I MULINUU MA SEPOLATAEMO I LUFILUFI ATUA.

Na iloa atu e tumua ua afio atu Tole’afoa, ona faiatu lea, afio mai i le Maota e te lua talatala ma le Tupu. Tali Tole’afoa, leai oute ava i tumua, ua lava a’u i lalo o le ulu lea. Ae sa augani atu lona aiga ma Tumua, afio ane ia i le maota. Na faofale loa Tole’afoa ma sa faa’alia lava lona fa’aaloalo ia Fonoti, ua fa’ae’e o ia i le pou pepe o leisi tala o le maota i Mulinuu ma Sepolataemo.

O le solo po’o le lalafu’a lenei a Alapapa, o le aitu tagata mai Safata na fai ia Tole’afoa ao fa’afofoga Fonoti, Aiga ma Tumua;

Ifo’ifo i se ala, a’ea’e i se ala,
O lo ua nofoa’i mai ata, valovalo manumuaga, le taeao o le a malama,
O le a potopoto Tumua i lou lagi fa’atafa.

O a’u e tusa i se manu, po ia i le ofaga!
Po’o Mulinu’u ea, po’o Nu’uausala,

O fa’atafa ai Tuia’ana?
O le a fou atu nei sa’u talosaga.

Tulouga lou fa’atafa,
Tulouga a le Maotaga,
Tulouga a le taulia o le fala,

A oe solotua i le taunu’u aigana.

Pe na ua aumai ea lea tala,
Na fa’apa’i mai ea lea tala?
Ua se ivi e fa’alava,
Ua talatala fa’alagoleia, le pa’i au e o tama.

Leulumoega e le sa ese’ese,
Ua tele lota mata’u ma lota fefe,
Ma’alili fa’atagata na ta’ele,

Ua peia le taualuga o Manu’a i le oia ma le vao i Fagalele.

Alapapa e, Alapapa!
Po’o Fuga ea ma Mau’ava,
Ne’i lua tu’u i le mao a le ala,
I le tina-toa ma le tina-ava,
Ma le Sapatu na motu pa,
0 le a tatou fano-i-ala.

Na’u tu i Togamau ma’u sa’afiafi.
Tulouga le matagi ne’i agi,
Tulouga le peau o le sami ne’i fati,
Tulouga a i’a fe’ai ne’i fa’asaga ane,
Ae se’i sao mai Tole’afoa,
O i le motu, i lou gasegase.

ONA AGIAGI ATU AI LEA O FONOTI E FA’APEA.. “Tole’afoa e, afio mai o le a totofi a ta mea, au’a le nofo lelei ai o lau fanau ma la’u fanau i le lumana’i. O le Ao o le Tonumaipe’a, o le a ia te oe ma lau fanau. O le a e saofia le Aumaga, o le mea lea e ta’ua ai le aumaga e pa’ia. Ona ole Ao o Tonumaipe’a ua i ai. E te afio i le fala, Na’o oe lava e te nofo i le fala i fafo, E sa seisi o le aumaga e nofo ise fala. A uma ona mama o le ava, e tu lava le tagata i luga ma lana maga’ava ma tu’u i le tanoa, a’o lau maga e tu mai se tasi na te avatua, ona aumai lea o le tanoa tu i ou luma. A leai se Tupu e alagaina e Tumua, O le a e Tuia’ana Ave’aumalaga! 0 le a fa’asino fo’i ia te oe upu o le aualuma. O lou aualuma o le a tausi e Leulumoega ma e na ta i Fasito’otai ma Fasito’outa.”

“O PAPA E FA, O LE A IA TE A’U MA LA’U FANAU!” A e toe tago mai i a’u mea, sauaina oe i le aufuefue ma soloa i le vailalo ma lau fanau. A ou tago atu i au mea ia fa’apea fo’i ona soloa a’u i le aufuefue ma tafea i le vailalo ma la’u fanau.

O le mavaega lea nai i Mulinu’u ma Sepolataemo i Lufilufi Atua, a Fonoti le Tupu ma lona uso o Va’afusu’aga Tole’afoa. O LO’O TAUSI IAI SAMOA I LENEI MAVAEGA E O’O MAI ILE ASO!

KING FONOTI TUPU TAFA’IFA OF SAMOA LINE HEADQUARTER TITLE HELDERS LOTOFAGA ATUA:

King Fonoti Tupu Tafa’ifa – Fonoti Nofoatolu Laufeti’iti’i – Fonoti Oliovaigafa – Fonoti Nofoatolu Fata – Fonoti Teoteo Tuipu’avai – Fonoti Fa’aai – Fonoti Falefetafa’i – Fonoti Tuala Sola – Fonoti Lei’o Atanoa – Fonoti Pua’a – Fonoti Fatu – Fonoti Mata’utia Ioane Brown – Fonoti Inu Saufo’i Brown – Fonoti Tuala Le Sa’oali’i Kamilo Brown.

(“e ufiufi a le tama’imoa i le tanoa, ae ioio lava..”)

wp33


Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: